ننعى رحيل الشاعر الكبير موفق محمد الذي أخرى الشعر العراقي باشعاره الجريئة…لبكره الخلود
ونين يفور جوه الكاع
ما چن الامر هين !
شنو شمدفون هذا اليوم ؟!
وليش الصوت ما يسكن ؟!
وليش الارض بالنجمات متصله ؟ الامر ممكن ؟!
شاعر مات !
شاعر مات ؟!
شاعر مات صاح الجن
الگمر يم گبره متدني
يسمع شعره وِيْصَفِّنْ
كل الموتة شو گامت
ومشت مصطفة مثل الدود
من كل اتجاه هواي
منا للشمس لحدود
شنو اسرافيل شال البوق
وصحه جدود فوگ جدود ؟!
صوت (الله) بالافاق
حفلة بعالم البرزخ
ملائكة السما يسمعون
موفق بالشعر يصرخ
چفوف إتلَّوِحْ وتنزل
امن التصفيگ تتملخ
و ( موفق) چن مسيح يگوم
وينفض لحدة عن جسمه
كلها تصيح : اهلا بيك
الهلاهل تهتف باسمه
يفگ (عريانه) الذرعان
(مظفر) يحمد النعمة
وي (السياب) إيد بايد
(نازك) ضحكة مبتسمة
(موفق) عاف ناسه وراح
يم الناس التفهمه
١٧-٥-٢٠٢٥
